Exchange Guide

留學生存之道-儲錢完sem去旅行六大招式

唔少人上大學都會去 exchange,希望放眼世界,探索香港以外嘅地方,而完sem出走去旅行, 就係成個exchange最令人期待嘅地方。但係窮學生往往budget有限,一個人喺外國生活,衣食住行樣樣都係錢。究竟點樣先可以應洗則洗,留返多D budget去旅行呢?筆者有以下儲錢六大絕招,希望可以幫到各位慳多D錢拎嚟去旅行啦:)

1. 行路/踩單車

外國公共交通工具通常都好貴,搭一程巴士已經25蚊港紙。好多人會每個月用大概400蚊買巴士月票,但係我就冇買巴士月票,只用140蚊買10程回數券,咁樣可以提醒自己盡量少搭巴士。其實外國生活節奏冇香港咁快,所以有時間嘅話,我會選擇行路或者踩單車。唔少歐洲國家都有濃厚嘅單車文化,有D仲會叫自己做單車之國。如果大家會喺外國住,又唔係住喺山上,不妨試試以單車代步。

[唔少學生平日都會以單車代步,沿途仲有好靚嘅風景可以欣賞。]

2. 自己買餸煮野食

香港出街食飯貴,喺外國出街食飯仲貴。因為唔少地方都有銷售稅,餐廳可能會向你收高達50%稅。所以最好嘅方法就係自己買餸自己煮,煮得多,就可以一次過買多D都唔怕擺得太耐。如果你有roommate或者dormmate,仲可以一齊夾錢買,順便交流一下D煮野食心得:我教你整中菜;你教我整西餐。一齊試下唔同菜式,慳到錢又開心。

[我去到丹麥頭兩個禮拜整過嘅菜式,當時平均一個禮拜洗100蚊港紙用嚟買野食。]

3. 環保可以慳錢

唔少地方都有環保方面嘅徵稅,例如膠袋稅,膠樽玻璃樽稅咁。除咗買野自備購物袋可以慳返幾蚊膠袋費之外,飲完野飲D膠樽、玻璃樽、汽水罐記住要keep。因為好多超市都會有回收機,只要將呢D樽同罐拎去回收,就可以拎返買嗰時嘅按金。

[呢部就係超市入面嘅回收機。]

[唔好睇小呢袋野。呢袋野可以退返30幾蚊按金ga!]4. 搵減價超市

如果要去外國生活一段時候,筆者建議先搜尋一下屋企附近有邊D超市。唔好以為間間超市都一樣,超市有分普通超市同減價超市。同一支汽水,普通超市賣40蚊,減價超市可以賣10蚊。另外,唔同國家超市價格好唔同。例如英國最平係Lidl,丹麥最平係Aldi(當然質素就認真麻麻),高質減價超市有Lidl同Fakta。睇清楚先去買,就可以買到高質又平嘅野。

5. 二手文化

新淨兼平慳錢唔代表一蚊都唔可以洗,而係應洗得洗。外國嘅二手文化發展得好好,身邊總有一間二手店喺附近。二手店嘅野多數都好新淨,價錢仲分分鐘平一大截。得閒去下二手店,見到心頭好又唔怕用太多錢,又可以減少浪費,可謂一舉兩得。

[呢件冷衫係某連鎖大牌子,喺哥本哈根一間二手店買到,計返港紙20蚊都唔駛。]

6. 親親大自然

喺香港呢片石屎森林,未必個個都會成日去郊外呼吸新鮮空氣。所以難得嚟到外國,當然要感受下大自然。你可以上網搜尋附近嘅公園、沙灘或者其他特別郊外地方。

好似我去過嘅Århus咁,近郊就有一個deer park免費開放俾公眾親親大自然。遊人可以自備蘋果蘿蔔餵俾公園入面嘅鹿食,行下公園。淨係餵下鹿同野餐,已經可以消磨一日。

[去Deer Park餵下鹿,摸下佢地已經可以玩一日。]

平時慳埋慳埋,完sem去旅行就可以用多D,試多D唔同嘅當地特產,又可以試下當地獨有嘅活動。好似去挪威坐船游峽灣,去冰島行冰川睇瀑布咁,人一世物一世,咩都要試下嘅。當你用慳埋嘅錢嚟周圍去旅行去玩,你就會覺得之前慳得咁盡都係值得。

[坐船睇挪威嘅峽灣]

[去冰島睇瀑布]

[睇香港睇唔到嘅風景同影靚相]

Tags: , , , , ,