校園Guide

Sem break旅行慳錢大法

去旅行從來都係豐儉由人,budget就得咁多喇,點先可以慳到盡,同時又算好食好住?其實學生呢個身份都幫到手,只要肯俾啲時間留意下有咩優惠,慳埋慳埋夠你係當地食餐好。

食:

  • 早餐隨便啲,午/晚餐就可以食好西。早餐動手動腳豐衣足食,前一晚係超市/市集買定麵包,住宿嗰度有廚房嘅仲可以煮多隻蛋。
  • 吃飯記得遠離旅遊熱點,唔好做「水魚」。
  • 除咗睇網上評價,亦可以問當地人有咩餐廳推介,發掘真‧地道美食,價錢一定比以遊客為主打既餐廳平。

 

住宿:

  • 唔住酒店,住青年旅舍更平。環境差啲,但可以短時間內獲得當地資訊,又易識到人,遇到啱路線嘅一齊平價拼車或一日遊,幾開心。而且青年旅舍通常有共享空間,好似廚房﹑洗衣間等,可以自己平平哋煮嘢食同洗衫。
  • 民宿﹑旅館都係另一個相宜選擇,但一定要睇實評價同早啲訂。
  • 網站推介:hotels.com,agoda,airbnb,Jalan(遊日本用),Kozaza(遊韓國用),Fun-taiwan(遊台灣用)

 

交通及觀光:

  • 機票唔使多講,肯追實都會發現優惠,但記得留意價錢包括咩,可能唔連稅唔包行李又無嘢食,計落仲貴過正價。
  • 留意下有冇學生優惠或信用卡優惠,買周遊券/旅遊卡/交通卡
  • 查定參觀景點或博物館嘅門票價錢,有啲地方有免費參觀時段,甚至唔需要門票。
  • 申請國際學生證(ISIC),俾HKD100可以用15個月,係全球買嘢﹑食嘢﹑住宿﹑交通都有折頭,上網查下有冇啱用嘅優惠再決定買唔買。
  • 隨身帶備食糧同水,唔好一肚餓口渴就買嘢。
  • 機票網站推介:flyday,meetHK.com,skyscanner

 

網絡:

  • 依家應該好少人用電訊公司嘅數據漫遊計劃,多數都租wifi蛋或買sim卡。Wifi蛋好在租一個就可以share晒俾所有人,越多人一齊去分攤費用就越平。漫遊sim卡網絡會穩定啲,建議係深水埗C2出口附近嘅檔攤買,好平。
  • 一到步可以用咗機場wifi收發msg先。有外國人出咗一個叫「WiFox」嘅app,可以睇到近150個外國機場嘅wifi密碼同位置,仲可以匯出離線檔案。
  • 去日韓台就唔使驚,因為市區有好多wifi熱點。係日本可以用「Japan Connected-frees Wi-Fi」check附近嘅wifi熱點;韓國分2款公共免費wifi:「Public [email protected]」同「Seoul_WiFi台灣嘅官方wifi係「iTaiwan」。